मराठा आरक्षणाच्या मागणीसाठी मनोज जरांगे पाटील पुन्हा एकदा आमरण उपोषणाला बसत आहेत. गेल्या तीन वर्षांतील हे त्यांचे 11 वे आंदोलन असल्याने या आंदोलनाकडे संपूर्ण महाराष्ट्राचे लक्ष लागले आहे.
आंदोलनाच्या पार्श्वभूमीवर जालना जिल्ह्यात पोलीस प्रशासनाकडून कडेकोट बंदोबस्त तैनात करण्यात आला आहे. आंतरवाली सराटी परिसरात सुमारे 400 पोलिसांसह डीवायएसपी, पीआय, आरसीपी आणि एसआरपीएफची पथके तैनात करण्यात आली आहेत. आंदोलनस्थळी चार ठिकाणी पोलिसांच्या राहुट्याही उभारण्यात आल्या आहेत.
यावेळी मनोज जरांगे पाटील यांनी समाजबांधवांना एकाच वेळी मोठ्या संख्येने आंतरवालीत दाखल न होता टप्प्याटप्याने येण्याचे आवाहन केले आहे. त्यामुळे आंदोलनस्थळी गर्दीचे नियोजन आणि कायदा-सुव्यवस्थेच्या दृष्टीने प्रशासनाकडून विशेष खबरदारी घेतली जात आहे.
मराठा आरक्षणासोबतच विद्यार्थ्यांना विविध सवलती मिळाव्यात तसेच अण्णासाहेब पाटील आर्थिक मागास विकास महामंडळाच्या व्याज परताव्याबाबतही मागण्या करण्यात आल्या आहेत.
दरम्यान, मागण्या मान्य न झाल्यास गरज पडल्यास मुंबईकडे कूच करण्याचा पर्यायही मनोज जरांगे पाटील यांनी खुला ठेवला आहे. मुंबईतील आझाद मैदानावर उपोषण करण्यासाठी अर्ज केल्याची माहितीही समोर आली आहे.
आता सरकार या आंदोलनावर काय भूमिका घेते, प्रशासन आणि आंदोलकांमध्ये संवाद होतो का आणि मराठा आरक्षणाच्या मागण्यांवर तोडगा निघतो का, याकडे संपूर्ण महाराष्ट्राचे लक्ष लागले आहे.
